Survival Run |
Dr Survial Run 2016 isch ersch verbi scho fougt dr nächscht. Wieder si mir dr LCA aus Häufer ufbotte worde. Am Vorabe ga nig mit em Gedanke ids Bett, hoffetlech rägnets morn nid. Nei, sit mir dört gö go häufe, heimer immer guets oder einigermasse passabels Wätter ka.
Und so isches ou am 05.März 2017. Es wird zwar nid di grossi Wärmi gä, aber für das heimer ja gueti Chleider. Agleit im Zibele Prinzip stömer de bir Häuferzentrale bereit und warte uf witeri Awisige vom Markus Urfer. Während däm mir so stö isch dr Platzspeaker scho flissig am Infos gä. Mir wüsse itz ou, das dr Chip unbedingt am lingge Fuess mues si. Aber müesse mir aus Häufer das itz ouno kontrolliere? Natürlech nid, mir wärde schüsch scho gnue z tüe ha, a üsne Pöschte. Da mir es igspiuts Team si, weis jede ungefähr a welem Poschte är wird si. Die wos gärn nass und schlammig hei, gö zu de Todesümpf, oder die wo gärn suber blibe zum Dead End, Hundschopf Monster Crossing, die perfekte Welle, u.s.w. Aber kei Angscht, so schlimm wie di Pöschte töne isches nid. So winig vernoh ha, isch ämu jede wieder usem Todessumpf use cho. Es isch ämu kene aus vermisst gmäudet worde. Di flissige Häuferli si immer zur Steu, wenns nötig isch. Mir si ou dieses Jahr wieder mit luschtige Sujets verwöhnt worde. Es bunts Gmisch vo Löifer isch da über di Hindernis gumpet, ghüpft, touchet, balansiert.
Zum Glück heimer dä Tag wie immer bim ne Pizzaässe chönne beände. So heimer no gnue Zyt zäme über dä Tag, üsi Erläbnis z philosophiere.
( 5. März 2017 / Text: G. Kurath; Bilder: mj)
Zurück zur Übersicht