Am haubi nüni am Samschtig Morge geits los uf üsi Schneeschuhtour, wo mer Wättermässig um ne Wuche hei müesse verschiebe. Scho bim uwache dänke nig, hüt wird ig hoffetlech öper gseh, wo nig scho es Zitli nüme gseh ha, nämlech z Sunne und blaue Himmu. Und was ig no nid weiss, das es tatsächlech e wunderschöne Tag wird wärde. Aber itz mues ig mi beeile, damit ig rächtzitig am haubi nüni wirde parat si. Scho bim ufefahre zeigt sech, dass z Sunne üse Begleiter wird si a däm Samschtig me gloubts fasch nid. Aber bevor mer üsi Schneeschueh chöi montiere mues z ersch mau z Outo vom Rolf Schneeschueh übercho i form vo Chöttine. Es isch es chlises Grüppli wo a däm Samschtig mit chunnt uf di Tour. Darf ig vorsteue: Dr Rolf üses Tureleiter, d Brigitte üsi erschti Fotografin steuverträtend für e Tinu, dr Dani Fotograf nummer zwöi und Gabi sinersits Schriberin vom Bricht. So stapfe mer los richtig Bolbärg em höchschte Punkt entgäge. Wöu dr Wätterbricht vo chaut und Bise het gret, heimer üs ipackt wi am Nordpol. Aber scho gli rünne di erschte Schweisströpfli und mir schwitze so, das mer üs müesse vor erschte Chleiderschicht trenne. Jede vo itz unger em Näbumeer mues si, tuet üs leid. Uese Tureleiter und di beide Fotografe mache iri Sach super. Ig chas eifach nume gniesse mini Büetz chunnt ja ersch nächär. Scho gli heimer dr höchscht Punkt erreicht und loufe witer richtig Spychere üses Rascht Ziu. Bim ne schöne Hütli machemer Pouse mit Tee, sünnele, und Bärge aluege. Und Briggitte isch stouz das si näb de beide Bärgekenner Dani und Rolf doch no z Finschteraarhorn het kennt. De loufemer witer richtig Lombachaup zrügg. Und wie guet üses Timing isch zeigt sech da drinn, das chum chömemer zrügg zur Lombachaup, dr Näbu wieder chunnt. Super Organisation Rolf, perfekter häts nid chönne si. Bim ne Fondue schliessemer de dä schön Tag ab, bevor mir wieder abe fahre, und z Outo später ouno vo sine Schneeschueh befreie.
(24. Februar 2018 / Text: G. Kurath; Bilder: B. Boss)