Mir fire 25 Jahr Trainingslager im Goms. Haut stimmt nid ganz vo dene 25 Jahr simer drü mau fremd gange id Länk. Und für so nes Jubiläum finge ig, isches Zyt echli Retour z luege. Agfange het aus mit dr Idee es Trainigslager im Goms z mache vo Rosi und Pesche. Weme wot ufstige mues me unge afah drum si mir z auerierschte Mau uf Gluringe. Dört heimer hert Trainiert und z aueri erschte Mau e Americaine düreführt. Dr Longjogg isch am Sunntig gsi und e Walking Gruppe hets ou nid gä. Am Morge heimer nid gmüetlech chönne ads Morgebuffet sitze, zersch hets no es Footing gä. Und am Schluss vom Lager heimer dr Bäse für z Putze no säuber müesse id Hand näh.
Es Jahr später simer de ufgstige uf Reckinge und nach drü Jahr Reckinge ganz ufe uf Oberwaud aber no nid i Sand. Dört in Oberwaud hets leider nume Masselager ka zum übernachte. Ig gloube, wär die Nächt vouer Schnarchle hin und här träie im Bett erläbt het, motzet nie meh über die herte Madratze im Holliday Camp.
Ou schüsch si di 25 Jahr mit viu Schweiss herte Trainings länge Lonjoggs verbunde gsi. Aber ou mit viune schöne Momänte viune Emotione. Es git fasch kei Hoger womer nid d Obe si gsi und wie mängisch säge ig, lueg zu däm Chrütz und däm simer ou scho ufe grennt. Es het ou gwüssi Veränderige gä, mit dr Zyt, so isch irgend einisch e Walking Gruppe dr zuecho, und am Afang isch nach deTrainings eigetlech nüt meh gloffe, aui si entweder nöime ine Beiz, oder vom Winde verweht gsi bis am Abe, mängisch in Reckinge no go bade.
Hüt heimer für die Zyt üsi Chüeche, wo mer gmühtlech chöi zäme hocke. I dene Jahr hei sech aber ou so nadisnah luschtegi Episödeli igschliche wo mer gärn dra dänke und drüber lachet. So zu Bispiu in Reckinge wo me öperem Charte gä het wo nid cha Charte läse und e Longjogg plötzlech fasch ufem Siduhorn gändet het. Denn womer uf dr Grimsu mit den churze Hösli und de Turnschueh zwüsche de dick verpackte Turischte düre kurft si. Oder wenn usem ne drü Stündige Longjogg plötzlech füf Stund wärde. Die Tour womer üs ufem Schmugglerpfad befunde hei bir «Porno Gries Hütte». D’Teilnämer vo de Lager hei gwächslet, si wieder gange, deu si blibe und deu si nöi cho. Aber d’Philosophie isch blibe gmeinsam öpis erläbe drü herti aber schöni Tage mit engang verbringe.
Das aues isch nume möglech wenn öper 25 Jahr am Charre zieht. Mersi Rosi und Pesche und aune Mithäufer.
(17.-19. August 2018 / Text: G. Kurath; Bild: mj)